दिनदिनै किन आकर्षण हुदैंछन् त .. बलिउडका अभिनेताहरु नेपाल प्रति..?

काठमाडौं : पछिल्लो समयमा विदेशी कलाकारको नेपाल भ्रमणप्रति चासो बढेको छ। भारतीय अभिनेता आमिर खान नेपाल आएर फर्किनासाथ अर्का अभिनेता जितेन्द्र कपुर नेपाल आएका छन्। तर यी दुईको नेपाल भ्रमणको उद्देश्य भने फरक छ। आमिर युनिसेफको कार्यक्रमका लागि आएका थिए भने जितेन्द्र घुम्न नेपाल आएका हुन्। उनीसँगै श्रीमती शोभा कपुरसहित लगभग १० जनाको टोली आइतबार दिउँसो नेपाल आइपुगेका हुन्। नितान्त पारिवारिक भ्रमणका लागि नेपाल आएका जितेन्द्र र उनको टोलीको एक साता लामो नेपाल बसाइमा काठमाडौंमा पशुपतिनाथ, स्वयम्भूलगायतका धार्मिकस्थल र पोखराको भ्रमण गर्ने योजना रहेको बताइएको छ। बालाजी टेलिफिल्मका अध्यक्ष जितेन्द्र र प्रबन्ध निर्देशक शोभालाई स्वागत गर्न चलचित्र निर्देशक सुरेशदर्पण पोखरेल त्रिभुवन अन्तर्राष्ट्रिय विमानस्थल पुगेका थिए। पहिलो पटक सन् १९७४ मा नेपाल आएका जितेन्द्रको यो चौथो नेपाल भ्रमण हो। पहिलो पटक आएदेखि नै आफूलाई नेपाल असाध्यै राम्रो लागेको जितेन्द्रको भनाइ छ। चलचित्र नवरागबाट बलिउडमा प्रवेश गरेका उनले सन् १९६४ मा निर्माण भएको चलचित्र 'गीत गाया पत्थरोंने'बाट नायकका रूपमा अभिनय गर्न थालेका हुन्। सन् १९६७ मा रिलिज भएको चलचित्र भने 'फर्ज'ले जितेन्द्रलाई दर्शकमाझ चिनाएको हो। बलिउडमा सदाबहार अभिनेताको पहिचान बनाएका उनी सन् १९४२ मा जन्मिएका हुन्। रवि कपुरबाट नाम परिवर्तन गरी जितेन्द्र क पुरका रूपमा उनी बलिउडमा स्थापित भएका हुन्। माला सिन्हा, शर्मिला टेगोर, आशा पारेख, हेमा मलिनीलगायतका चर्चित अभिनेत्रीसँग अभिनय गरेका छन्। ९३ वटा चलचित्रमा एकल मुख्य भूमिका, एक सय तीन मल्टिस्टार चलचित्रमा मुख्य अभिनेता, दुई चलचित्रमा सहयोगी भूमिका र २६ चलचित्रमा अतिथि भूमिकामा उनले काम गरेका छन्। जितेन्द्र अभिनीत चलचित्र मक्सदले सन् १९८४ मा सर्वाधिक कमाइ गर्ने चलचित्रका रूपमा बक्स अफिसमा स्थान बनाएको थियो। सन् १९८० को दशकमा बलिउडका धेरै पारिश्रमिक लिने अभिनेतामध्येमा उनी पनि पर्थे। तुम्हारी कसम, एक ही भूल, परिचय, खुश्बु, दुल्हन, किनारा, मेरी आवाज सुनो, उधार कि जिन्दगी, सन्तानजस्ता सफल चलचित्र उनको नाममा छ। आफ्नो पचासवर्षे अभिनय यात्रामा कुनै विवादमा नपर्नु उनको अर्को विशेष पहिचान मानिन्छ। जितेन्द्रका सन्तान एकता कपुर र तुसार कपुर दुवैजना चलचित्र क्षेत्रमै क्रियाशील छन्। -एजेन्सीको सहयोगमा