बिजुलीबजारमा बस पल्टिदा तीनको मृत्यु ट्यांकरको ठक्करले एकको मृत्यु

काठमाडौ, आश्विन २७ - धुलीखेल-काठमाडौं चल्ने यात्रुबाहक बस काठमाडौंको बिलुजीबजारमा पल्टिदा तीन जनाको मृत्यु भएको छ । धुलीखेलबाट आएको बा१ख ८६७६ नम्बरको बस केहीबेर अघि सडकमा पल्टिएको थियो । बस पल्टिदा बा३२प २३७६, बा५६प ३५३८, बा३७प १६३९, बा६५प ३६९८ नम्बरको मोटरसाइकल थिचिएको छ । घटनाको विस्तृत विवरण आउन बाँकी रहेको प्रहरीले जनाएको छ । घटनामा घाइते भएकाहरुको बानेश्वरस्थित निजामति अस्पतालमा उपचार भइरहेको छ । यसैगरी, काठमाडौंको पुरानो बसपार्कमा एक ट्यांकरको ठक्करबाट स्कुटर चालकको मृत्यु भएको छ । मृतकको पहिचान भइनसकेको प्रहरीले जनाएको छ । ना२ख ३२१७ नम्बरको ट्यांकरको ठक्करले बा५०प ७६७७ स्कुटर चालकको मृत्यु भएको प्रहरीले जनाएको छ ।