हेटौंडामा ट्रक दुर्घटना, सातको मृत्यु, नौं जना घाइते(फोटोफिचर

मकवानपुर, कार्तिक १८ । मकवानपुरको हेटौंडा नगरपालिका वडा १७ चुरियामाईमा आज बिहान भएको ट्रक दुर्घटनामा परी सात जनाको घटनास्थलमै मृत्यु भएको छ । मृत्यु हुनेमा सर्लाही ८ औराही पटेर्वाका सौर्याराम महत्तो, झगरु महत्तो, जीत पासवान, रामवली माझी, बिशेष यादव र जंगीलाल महत्तो रहेका छन् । एक जनाको सनाखत हुन सकेको छैन ।


दुर्घटनामा नौ जना घाइते भएका छन् । मृतक र घाइते सबै मजदुर रहेका छन् । घाइतेमध्ये तीन जनाको अवस्था गम्भीर रहेको छ । गम्भीर घाइतेहरुको भरतपुर अञ्चल अस्पतालमा उपचार भईरहेको छ । सर्लाहीबाट चितवन तर्फ आउंदै गरेको ना ४ ख १२५२ नम्बरको ईट्टा बोकेको ट्रक चुरियामाईको उकालो सकिए लगत्तै अनियन्त्रित भई दुर्घटनाग्रस्त भएको प्रहरीले जनाएको छ । घाइते यात्रुका अनुसार पथलैयाबाट सहचालकले ट्रक चलाएका थिए । ट्रक चालक र सहचालक दुबै फरार रहेका छन् । ट्रकमा १७ जना सवार थिए ।