हराइरहेका विमानका क्याप्टेनकी छोरीले भनिन्- पापा, छिट्टै घर आउनुस्

१४ पुस, काठमाडौं । आइतबारदेखि हराइरहेको एयर एसियाको विमानका यात्रुका आफन्तहरुका आँखामा आसु रोकिएको छैन । इण्डोनेसियाको सुरबाया एयरपोर्टमा यात्रुका परिवारका सदस्य तथा आफन्तहरुको ठूलो उपस्थिति छ । विमानका १६२ यात्रुमध्ये १५६ इण्डोनेसियाका छन् । विमानका क्याप्टेन अरियान्तोका छोरीले फेसबुकमा निकै भावुक स्टाटस लेखेकी छन् । बाबु सँगको तस्वीर पोष्ट गर्दै २२ वर्षीया एन्जेलाले लेखेकी छन्-‘पापा, छिट्टै घर आउनुस्, मलाई तपाईको आवश्यकता छ ।’ अरियान्तो निकै अनुभवी विमान क्याप्टेन हुन् । उनीसँग २० हजार घन्टा उडानको अनुभव छ, जसमा एयरबस ३२० को ६१०० उडान घन्टा पनि छ । व्यवसायिक प्लेन चलाउनुअघि उनले लडाकू विमान एफ-१६ को उडान गरेका थिए । इण्डोनसियास्थित उनको घरमा परिवारका सदस्यहरुलाई सहानभूति दिन छिमेकी र आफन्तहरु पुगेका छन् । एक छिमेकीले भनेका छन्-क्याप्टेन अरियान्तो राम्रो मानिस हुन् । यसै कारण हामीले उनलाई आफ्नो इलाकामा नागरिकको संस्थाका प्रमुख बनाएका थियौं ।’ १६२ यात्रुसहित हराइरहेको एयर एसियाको विमान समुन्द्रमा खसेको आशंका गरिएको छ । इण्डोनेसियनाको सुरबायाबाट सिंगापुरका लागि उडेको एयर एसियाको विमान आइतबार विहानबाट सम्पर्कबिहीन भएको थियो