सकियो इन्छन महाकुम्भ, नेपाल एक कास्यपदकमै सीमित, चीन पहिलो स्थानमा
Saturday, October 4, 2014
|
इन्छन, आश्विन १८ । दक्षिण कोरियाको इन्छनमा भएको १७औं एसियाली खेलकुदमा नेपाल एक कास्यपदकमै समेटिएको छ । शनिबार (आज) अन्तिम दिन कराँतेको एकमात्र खेलमा अनु अधिकारीले खेलेसँगै नेपालको सहभागिता केवल एक पदकमा सकिएको हो ।
५० किलो तौल समूहको स्पर्धामा अनुले थाइल्यान्डकी खेलाडीसँग ४-१ को हार बेहोरिन् । नेपालले २५ खेलमा दुई सय बढी खेलाडीले सहभागिता जनाएकामा कराँतेकी विमला तामाङले कास्य जितेर इतिहास आफ्नो नाममा लेखाएकी हुन् ।
यसैबीच, ३६ खेलका चार सय ३९ स्पर्धामा भएको इन्छन एसियाडमा पदकका आधारमा चीन सदाझैं अब्बल बनेको छ । चीनले एक सय ५१ स्वर्ण, एक सय ९ रजत र ८३ कास्यका साथ तीन सय ४३ पदक बटुल्दै शीर्ष स्थान ओगट्यो भने आयोजक दक्षिण कोरिया ७९ स्वर्णसहित दोस्रो तथा जापान ४७ स्वर्णका तेस्रो स्थानमा रह्यो ।
११ स्वर्णसहित आठौं स्थान ओगटेको भारत दक्षिण एसियाको सर्वाधिक सफल टिम बनेको छ । एक स्वर्णसहित पाँच पदक बटुलेको पाकिस्तान दक्षिण एसियाको दोस्रो तथा एक स्वर्ण र एक कास्य जितेको श्रीलंका तेस्रो सफल टिम बन्यो । बंगलादेशले एक रजत र दुई कास्य तथा अफगानिस्तानले एक रजत र एक कास्य जिते ।
दक्षिण एसियाका भुटान र माल्दिभ्ससहित आठ देश भने रित्तो हात घर फर्कंदैछन् ।
साँझ विशेष समारोहकाबीच मुन्हक मुख्य रंगशालामा इन्छन एसियाडको समापन भएको छ । ‘विविधता झल्कन्छ यहाँ’ नारा दिएर सुरु भएको इन्छन एसियाडको समापन १८औं एसियाडको आयोजक देश इन्डोनेसियालाई झन्डा हस्तान्तरण गरेसँगै सकिएको हो । १८औं एसियाड जाकर्तामा हुनेछ ।
|
|
Comments[ 0 ]
Post a Comment